كفاية غربة

[علي بتيك]

كلمات مهداة لحرمنا المصون (هيام) في ذكرى قدومها لرياض الخير.. لها ولصغارنا ولوطننا الكبير.
انت يا در الزمان
وانت يا نبع الحنان
انت يا ست الحسان
وانت يا حسن المحاسن
حملت أشواقي وهاجرت ليك
قطعت فيافي ووصلت ليك
نظمت قوافي بين أيديك
نثرت في عينيك روائع
وكتبت في سيرتك جوامع
والكلام العندي قلتو..
صغتو شعراً.. ومرة نثراً..
ومرة كان الصمت أبلغ
الغربة نالت مني خالص
هدت فيني حيل
وخلت فيني ميل
شالت من عمري الكتير
ورتني ياما .. وياما شفت
ناس بتلهث لي سراب
وناس بتبني قصوراً من رمال
ناس معلقة بالقشور
وناس تفكر وعايزة ترجع
وكيف حترجع مع "جهازاً" ما بيسمع؟
بكرة نرجع لي بلادنا
و تاني نحبو في ترابا
نقالد أهلنا في رحابا
ننبذ الحرب والحرابا
فيها نسعى وليها نبني
وما بنبعد ضمة تاني
بكرة نرجع لي بلادنا
و تاني نحبو في ترابا
علي بتيك ــ الرياض ــ أبريل 2006م

[جحا النوبي]

صدقت يا ابن عمي ، كفاية غربة ومرمطة
انت غايتو عقلتها وتوكلت ، وربنا يسهل لينا كمان ونجيكم هناك ، بس شوفو لينا شغلانة نتشعلق فيها ونسترزق منها عشان نجيكم باطمئنان
مع تمنياتي لك ولاسرتك الكريمة كل الصحة والعافية